KAN VANGLAI HUN LEH NI ZAWNGTE...(Kan Lalpa tan hlan zelin)

KTPLympic 2010 chu naktuk zan hian Upa C. Vanlalsiama (Kohhran representative) chuan Sangluri Hall-ah a khar dawn ta, a lunglenthlak dawn ruai ruai khawp mai. Kumin kan Sports hlawhtlinna bul ber hi engnge ni ang tiin inzawt ta ila, chhan dan a inang lo nual awm e. Sports Sub-Committee te inpekna leh remhriatna a ni ti ila tuman an hnial buai thei lo vang. Chutih lai chuan member-te inpekna leh phurna vanga he KTPLympic hi hlawhtling a ni ti ila, hei phei hi chu sawi buai ngam chi a ni lo. A hlawhtlinna chhan bulpui ber lo lang ta chu kan zavaia kan tangrualna leh inpekna avangin KTPLympic hi a hlawhtling a ni.

Infiam leh inel kan nih miau avangin kan tanga, kan tang tur pawh a ni. Kan Group tan theihtawp kan chhuah tur a ni. Chuti ni lova zawmthaw deuhva kan ti a nih chuan Sports hlawhtling kan nei ngai lo vang. Hetih lai hian kan tan lutuk avanga mi rilru hliam palh theihna kawngah a bikin ACTIVE MEMBER-te chu kan insum thiam tur a ni a, kan dik zawkna thilah pawh ngawih a ngaih huna ngawi mai thei kan nih a tul fo dawn a ni. Kan Sports chhan hi member hlate huikhawm a nih miau avangin kan hlawhtlinna chu Medal kan lak tamah teh a ni dawn lo va, kan Group-ah member hla engzah nge he Sports avang hian lo tel belh tih kha kan intehna tur a ni ang.

Kumina phur taka Lympic-a telte hi nakkum lamah chuan a thenten KTP min chhuahsan dawn a, tin a thente chu pasal neiin hmun dangah pawh kan la awm maithei. Tin, eizawnna leh zirna avanga hmun danga awm ngai te pawh kan awm ang, chuvangin naktuk zan, a khar zanah hi chuan hlim takin, kan theih anga hlima hman vek i tum ang u. Kan vanglai hun a rei dawn si lo, Pathian zaarah kum 100 thleng pawh dam ni ila, kum 40 thleng bak hi KTP-ah kan inhmang thei dawn si lova, chuvangin KAN VANGLAI HUN LEH NI ZAWNGTE KAN LALPA TAN I HLAN ZEL ANG U!!!